As universidades galegas contarán en breve con oficinas de software libre. A medida porase en marcha grazas á sinatura dun convenio de colaboración entre as tres institucións académicas e a Consellaría de Innovación e Industria, polo que o departamento autonómico destinará 240.000 euros a este fin, 80.000 para cada unha das tres universidades.

Os licenciados en Administración e Dirección de Empresas caracterízanse pola súa rápida inserción no mercado laboral, o baixo nivel de paro co que contan e a súa versatilidade para ocupar diferentes postos de traballo. Estas son as conclusións ás que se chegaron nas mesas redondas organizadas pola Facultade de Ciencias Empresariais e Turismo e o Colexio de Economistas de Ourense nas que se analizaron as saídas profesionais da titulación. Nelas, destacados economistas da cidade contaron as súas propias experiencias ao rematar os estudos e aconsellaron aos alumnos á hora de encamiñar o seu futuro.

Un terzo de docencia en galego, castelán e inglés en todas as carreiras. Esta é a aspiración que o director da Área de Normalización Lingüística, Xosé Henrique Costas, agarda se materialice nun futuro a través do Programa de promoción do plurilingüismo na docencia que un ano máis ven de convocar a Vicerreitoría de Relacións Institucionais.
O aumento da docencia en lingua galega e estranxeiras, prioritariamente inglés, portugués, francés e alemán, é o obxectivo do programa que en tres anos, segundo confirma Costas “traduciuse en que uns 30 profesores que daban clase en inglés pasaron a dar clase en galego, outros 30 que daban clase en español, pasaron ao inglés e unha profesora pasou do español ao francés”.

A piques de comezar os temidos exames, son moitos os estudantes que sofren síntomas de estrés e ansiedade que, ademais de repercutir nos resultados académicos, poden producir problemas persoais. Para axudar a superar con éxito este período, o Gabinete Psicopedagóxico do campus, en colaboración coa Concellería de Igualdade, Xuventude e Voluntariado e Termalismo de Ourense, pon en marcha o programa RelaXoves: xoves de relax, do que as técnicas de relaxación e autocontrol serán o eixo central. Ademais, e como novidade, as actividades previstas levaranse a cabo no marco das termas de Outariz, a partir do 15 de maio e durante catro semanas consecutivas.

Como calquera outro bolseiro ao terminar as prácticas, Jacobo Rey, a primeira persoa con Síndrome de Down que desenvolveu unha tarefa profesional no campus, recolleu o seu certificado acreditativo. Con nostalxia da conserxería do Edificio de Ferro, onde durante cinco meses desempeñou labores auxiliares, Jacobo non marchou moi lonxe. Actualmente segue a traballar na Universidade de Vigo, concretamente no pavillón de deportes, aínda que xa cun contrato laboral.

Mellorar as ferramentas de recuperación de información para que os buscadores como Google funcionen con eficacia e flexibilidade grazas ao procesamento da linguaxe natural é o principal obxectivo no que o grupo Compiladores e Linguaxe, Cole, vén traballando dende hai 15 anos. Neste tempo, levou a cabo trinta proxectos oficiais en convocatoria competitiva tanto nacional como internacional, así como outros tantos contratos con empresas e institucións. Ademais, un amplo abano de traballos científicos, con centos de artigos publicados nos foros internacionais máis prestixiosos, avalan o seu traballo.
O grupo Cole pertence e lidera dende a súa creación a Rede Galega de Procesamento da Linguaxe e Recuperación de Información, financiada pola Xunta de Galicia, formada por sete grupos de investigación das tres universidades galegas, dous deles da de Vigo: Cole e o de Gramática Cognitiva e Funcional. Trátase dunha rede multidisciplinar que reúne o traballo dun conxunto de informáticos, que afondan no desenvolvemento de arquitecturas, e lingüistas que formalizan o problema para a recuperación de información en dicionarios, xestión documental, e categorización de documentos aplicado a busquedas rápidas en Internet.